கடந்த இரு நூற்றாண்டுகளில் வாழ்ந்த, வாழ்ந்து வரும் வரலாற்று அறிஞர்கள், பல துறை வல்லுநர்கள் மாமன்னர் ராஜராஜனைப் பற்றி எழுதியதை நூலாசிரியர் தொகுத்துள்ள விதம் பாராட்டத்தக்கது. பொதுவாக, தொகுப்பு நூலில் கூறியது கூறல் என்பது தவிர்க்க முடியாதது. இருந்தாலும், அவரவர் பார்வையில் கட்டுரைகள் அமைந்துள்ளது கூடுதல் சிறப்பு.
முதலாம் ராஜராஜனின் பிறப்பு, குடும்பம், ஆட்சிப் பொறுப்பேற்ற சூழல், எதிர்கொண்ட சவால்கள், பெற்ற பட்டங்கள், தொடர்புடைய சிற்றரசர்கள், அமைச்சர்கள், படைத் தலைவர்கள், அதிகாரிகள், வெளிநாட்டுத் தொடர்புகள், மெய்க்கீர்த்திகள், எதிர்கொண்ட போர்கள், நிர்வாகம், சமயக் கொள்கை, அவர் நிர்மாணித்த பெரிய கோயில், அங்குள்ள கல்வெட்டுகள் கூறும் செய்திகள், அதன்மூலம் அறியப்படும் ராஜராஜனின் புகழ் எனப் பல கோணங்களில், பல தலைப்புகளில் செய்திகளை அறிய முடிகிறது.
காலம் காலமாக பெரிய கோயில் குறித்து மக்களிடையே நிலவும் சில புதிர்களுக்கு குடவாயில் பாலசுப்பிரமணியன் கட்டுரையில் விளக்கம் அளிக்கப்பட்டுள்ளது.தொகுப்பில் வ.அய். சுப்பிரமணியம், ஓவியர் சந்ரு ஆகியோரின் கட்டுரைகள் வலிந்து திணிக்கப்பட்டுள்ளது போல் தெரிகிறது. "இராஜராஜசோழனுலா'வை பின்னிணைப்பாகத் தந்திருக்கலாம். பல அரிய செய்திகளைக் கொண்டுள்ள இந்தத் தொகுப்பு, இராஜராஜனுக்குச் சூட்டப்படும் மற்றொரு மணிமகுடம். அனைவரும் படிக்கவேண்டிய நூல்.
-maraththamilar senai
No comments:
Post a Comment